മനുഷ്യനോടും അവന്റെ ചരിത്രപരതയോടുമുള്ള അവരുടെ നിലപാടുകള്, ആട്ടിന്തോലിട്ട് മറച്ചിരിക്കുന്ന കൂര്ത്ത കൊമ്പല്ലുകളെയും അവയില് നിന്ന് ഒലിച്ചിറങ്ങുന്ന ചോരത്തുളളികളെയും പകല്വെളിച്ചത്തില് കാണിച്ചു തരാന് പോന്നതാണ്. അത്തരം നിലപാടുകളുടെ രാഷ്ട്രീയം തുറന്നു കാട്ടലും ഈ ബ്ലോഗിന്റെ ലക്ഷ്യമാണ്.
സമുദായം മുതല് ദേശ-രാഷ്ട്രം വരെ നീളുന്ന പരികല്പനകളെ ഞങ്ങള് നിരാകരിക്കുന്നില്ല. എന്നാല് അവയുടെയൊക്കെ ആധാരം തികച്ചും മതനിരപേക്ഷമായ ഒന്നാണെന്നും മനുഷ്യന് എന്ന പൊതുസ്വത്വത്തിനു അവ കീഴ്പ്പെടണമെന്നും ഞങ്ങള് വിശ്വസിക്കുന്നു. മനുഷ്യത്വം എന്ന സങ്കല്പത്തെ ബലികൊടുത്തുകൊണ്ടുളള ഒരു സാമൂഹ്യാസ്തിത്വവും -അത് മതപരമോ, സാംസ്കാരികമോ എന്തുമായിക്കൊള്ളട്ടെ- ഞങ്ങള് അംഗീകരിക്കുന്നില്ല. അവയുടെ എതിര്പക്ഷത്താണ് ഞങ്ങള്. ഞങ്ങളുടെ നാവാണ് ഈ ബ്ലോഗ്.
മതനിരപേക്ഷത എന്ന ആശയത്തെ ഉയര്ത്തിപ്പിടിക്കുക എന്ന ലക്ഷ്യമാണ് ഈ ബ്ലോഗിനുളളത്. വര്ഗീയമായ എല്ലാത്തരം വിഭജനങ്ങളെയും അത് എതിര്ക്കുന്നു. അതുകൊണ്ടു തന്നെ, ഹിന്ദു-ക്രിസ്ത്യന്-മുസ്ളിം വര്ഗീയതകളെ പ്രീണിപ്പിക്കുന്ന എല്ലാ (അ)രാഷ്ട്രീയ നിലപാടുകള്ക്കെതിരെയും ഞങ്ങള്ക്ക് വ്യക്തമായ നിലപാടുകളുണ്ട്.
അതാതിടങ്ങളിലെ അധികാരരാഷ്ട്രീയത്തിന്റെ അവിഭാജ്യഘടകമായി മാറാന് ഭൂരിപക്ഷ വര്ഗീയതയ്ക്ക് കഴിയും. ഒരു ഫാസിസ്റ്റ് പ്രത്യയശാസ്ത്രത്തിന്റെയും ഒരു ഫാസിസ്റ്റ് ദേശീയ-സ്വത്വ നിര്മ്മിതിയുടെയും ഏറ്റവും നല്ല ചേരുവയായി ഭൂരിപക്ഷവര്ഗീയതക്ക് മാറാന് കഴിയുന്നത് അസുലഭമായ ഈ സൌകര്യം ഒന്നുകൊണ്ടുമാത്രമാണ്. ഈ ലോകത്തെ ഫാസിസത്തിന്റെ പരീക്ഷണ നിലമാക്കാനുളള ഏതൊരു ശ്രമത്തെയും ഞങ്ങള് എതിര്ക്കുന്നു.
സാമ്രാജ്യത്വം എന്ന ആശയത്തിനും എതിരാണ് ഞങ്ങള്. സാമ്രാജ്യത്വം എന്നത്, കേവലം അമൂര്ത്തമായ ഭയമല്ലെന്നും ''ഇതര' (വിജാതീയ) സംസ്ക്കാരങ്ങളെ ബലപ്രയോഗത്താല് അടിമപ്പെടുത്താന് ശ്രമിക്കുന്ന ഏകധ്രുവലോകത്തിന്റെ പ്രത്യയശാസ്ത്രമാണെന്നും ഞങ്ങള് വിശ്വസിക്കുന്നു. സാമ്രാജ്യത്വത്തിനും ഫാസിസത്തിനും ഒരുപോലെയുളള ഈ പൊതുസ്വഭാവത്തെ ഞങ്ങള് തിരിച്ചറിയുന്നു.
ഇവയൊക്കെ മനുഷ്യനെ ചുട്ടുതിന്നുന്ന പ്രത്യയശാസ്ത്രങ്ങളാണെന്ന് ആവര്ത്തിച്ച് ഉരുക്കഴിക്കേണ്ടി വരുന്നത് ഈ തിരിച്ചറിവു കൊണ്ടാണ്. വ്യക്തിപരമായും കൂട്ടു ചേര്ന്നും ആ ആശങ്ക പലപ്പോഴും പങ്കുവെച്ചിട്ടുമുണ്ട്.
മനുഷ്യന് പരസ്പരം കൊന്നു തളളുന്പോള് അതില് ഹിന്ദുവെത്ര, മുസല്മാനെത്ര, ക്രിസ്ത്യാനിയെത്ര എന്ന് കണക്കെടുക്കുന്നവരെ, ഒരു മനുഷ്യന്റെ ചോരയേക്കാള് മഹത്തരമോ ഹീനമോ ആണ് മറ്റൊരു മനുഷ്യന്റെ ചോര എന്നു കരുതുന്നവരെ, ഒരു സംസ്കാരത്തേക്കാള് മികച്ചതാണ് മറ്റൊരു സംസ്കാരമെന്നു കരുതുന്നവരെ അവസാനശ്വാസം വരെ ഞങ്ങള് എതിര്ക്കും. എല്ലാ ചോരയും ഒരുപൊലെ വിലപ്പെട്ടതാണെന്നും, എല്ലാ മനുഷ്യരും തുല്ല്യരാണെന്നും അവര്ക്കെല്ലാം ഒരുപോലെ അവകാശപ്പെട്ടതാണ് ഈ ഭൂമിയെന്നും ഞങ്ങള് അകമഴിഞ്ഞ് വിശ്വസിക്കുന്നു.